Ezr 5 | NdeIBE | STEP | Ngalesosikhathi uHagayi umphrofethi loZekhariya umphrofethi, umzukulu ka-Ido babephrofetha kubaJuda laseJerusalema ngebizo lika Nkulunkulu ka-Israyeli onguye owayephezu kwabo.

Ezra 5

Incwadi kaThathenayi Isiya kuDariyu

1 Ngalesosikhathi uHagayi umphrofethi loZekhariya umphrofethi, umzukulu ka-Ido babephrofetha kubaJuda laseJerusalema ngebizo lika Nkulunkulu ka-Israyeli onguye owayephezu kwabo. 2 Kwasekusithi uZerubhabheli indodana kaShilithiyeli loJeshuwa indodana kaJozadaki baqalisa ukwakha kutsha indlu kaNkulunkulu eJerusalema. Abaphrofethi bakaNkulunkulu babelabo bebancedisa.

3 Ngalesosikhathi uThathenayi umbusi wangaphetsheya kweYufrathe loShethari-Bhozenayi labaphathisi babo baya kubo bababuza bathi, “Ngubani olivumeleyo ukwakha kutsha ithempeli leli lokuvuselela lesisakhiwo?” 4 Babuza njalo bathi, “Ngobani amabizo amadoda ayakhayo indlu le na?”

5 Kodwa ilihlo likaNkulunkulu wabo lalibalindile abadala babaJuda kabazange beme kuze kuyofika umbiko kuDariyu kubuye njalo impendulo yakhe ibhaliwe.

6 Le yiyo incwadi eyathunyelwa nguThathenayi umbusi wangaphetsheya kweYufrathe loShethari-Bhozenayi labasekeli babo, izinduna zaphetsheya kweYufrathe yaya kuDariyu iNkosi.

7 Umbiko abawuthumelayo wawubhalwe kanje: Kuyo iNkosi uDariyu: Ukubingelela okuhle.

8 Inkosi kufanele yazi ukuthi saya esiqintini sakoJuda, ethempelini likaNkulunkulu omkhulu. Abantu bayalakha ngamatshe amakhulu, kunqunyiswa imijabo emidulini. Umsebenzi uqhutshwa ngokukhuthala, njalo uyaphambili ngokuphangisa ukhokhelwa yibo.

9 Sabuza abadala bakhona sathi, “Ngubani oliphe imvumo yokwakha kutsha leli ithempeli lokuvuselela isakhiwo lesi?

10 Futhi sababuza amabizo abo ukuze sibhale amabizo abakhokheli babo sisenzela ukukwazisa.

11 Nansi impendulo abasipha yona: “Siyizinceku zikaNkulunkulu wezulu lomhlaba, yikho silakha kutsha ithempeli elakhiwa kudala, elakhiwa yinkosi enkulu yako-Israyeli yaliqeda. 12 Kodwa ngenxa yokuthi okhokho bethu bamthukuthelisa uNkulunkulu wasezulwini, wabanikela ezandleni zikaNebhakadinezari umKhaledi, inkosi yaseBhabhiloni owalibhidlizayo lelithempeli abantu wabaxotshela eBhabhiloni.

13 “Kodwa ngomnyaka wokuqala ka-Khurosi inkosi yaseBhabhiloni, iNkosi uKhurosi wakhupha isimemezelo sokuthi kwakhiwe indlu kaNkulunkulu. 14 Wabuye wasusa ethempelini laseBhabhiloni izimpahla zegolide lesiliva ezendlu kaNkulunkulu ezazithethwe nguNebhukadinezari ethempelini eJerusalema waziletha ethempelini eBhabhiloni. “Kwathi iNkosi uKhurosi yazinika indoda eyayithiwa nguSheshibhazari, eyamkhetha ukuba ngumbusi, 15 wamtshela wathi, ‘Thatha izimpahla lezi uhambe lazo uyozibeka ethempelini eJerusalema. Njalo yakha kakutsha indlu kaNkulunkulu endaweni yayo.’ 16 Yikho uSheshibhazari weza wabeka izisekelo zendlu kaNkulunkulu eJerusalema. Kusukela ngalelolanga kuze kube manje ibilokhu isakhiwa kodwa kayikapheli.

17 Ngakho-ke uma kuyikuthanda kwayo inkosi, kakudingisiswe ezincwadini zezindaba zamakhosi aseBhabhiloni kubonwe ingabe yikho na ukuthi iNkosi uKhurosi wayesenzile isimemezelo sokuthi yakhiwe indlu le kaNkulunkulu eJerusalema. Lapho-ke inkosi kayisithumele isinqumo sayo ngendaba le.”